Honnes 284
Aus Flerschemerisch.de
So sinn se halt, die Kombjuder
Omm Stommdisch omm Sunndaach hott de Schorsch gesaat: Habderrs aach gelese, dasses in Deutschland immer mehr Kombjuder unn immer wenischer Kinner gibt? Awwer wie werrden dess in zwonsisch Johr, solle dann die Kombjuder die Arweit beim Opel schaffe, weils nitt mehr genuch junge Leit gibt?
No ja, moont de Karl, so enn Kombjuder brauch immer noch enn Mensch, der devorhockt unn die Tasde dricke dut.
Sät de Schorsch: Awwer wo onnerst konns bald so soi, dass der oone Kombjuder dem onnern sät wassr ze mache hott, ohne dass ooner devorhockt.
De Karl hott genickt. Ah ja. Doo fällt merr die Sach mett de Börse oi. Doo hott doch vor e paar Daach so enn Simpel uff de verkehrte Knopp gedrickt, hott zu vill von irchendwelche Babiern verkaaft unn schunn hawwe die Kombjuder uff de gonz Welt verrickt gespillt unn hawwe verkaaft wasses Zeich hält unn die Kurse sinn abgesterrzt.
Ja, hott de Schorsch gesaat, dess iss doch dess was ich moon. Oon Kombjuder sät dem onnern was ze due unn ze losse iss unn weil so enn Kasde joo koon Verstond hott, mächt der was merr in soin Speicher oigewwe hott. Enn Mensch det erst iwwerleesche unn det frooche: Du, Kumpel, warum hosde dann so vill Babiern verkaaft? Unn wenn der dann saache det, Mensch, ich Bleedmonn habb de verkehrte Knopp gedrickt, dann kennt merr saache, no ja, der hott verkaaft, awwer ich behalt moi Sach.
De Karl druff: Die Kombjuder iwwernemme die Herrschaft iwwer uns. Wennse erst emol gebaut sinn, dann brauchese koo Mensche mehr. Guck doch emol mett unserm Strom. Weil wo der gemacht werrd unn wo der verbraucht werrd, dess gieht alles iwwer Kombjuder unn die verdeile den Strom iwwer gonz Deutschland. Es gibt Leit die saache, dass bald die Stromnetze iwwerlast sinn unn die donn nitt den Strom von de Windmiehle im Norde nooch Süde bringe kenne. Unn wenns nitt genuch Strom gibt schalte die Kombjuder den Strom dorthie, wo omm meisde deferr bezahlt werrd.
Ich habb gegrinst. Awwer aach die Kombjuder brauche die Mensche, weil ohne Mensche gibt’s irchendwonn koon Strom mehr unn die Kombjuder misse ihrn Geist uffgewwe. Unn deshalbt dun sich die Stromkombjuder unnernonner so programmiern, dass die Menschheit nitt aussterwe dut.
Unn wie mache die dess?, frächt de Karl.
Ich saach: In so emm Fall mett de Windmiehle kennte die joo mehr Kraftwerke oischalte unn de Strom wär doo. Awwer naa, bevor die Netzkabel dorschbrenne, schalte die Kombjuder den Strom ab unn ess werrd dunkel im Lond. Wie kerrzlich in Amerika.
Fracht de Schorsch: Unn was hott dess mettem Aussterwe von de Menschheit ze due?
Ich habb noch mehr gegrinst. Weil wenns dann dunkel werrd iwwerall, weil koon Strom mehr doo iss, also aach koon Fernseher mehr lääft, was mache die Mensche dann? Was hawwe se in Amerika gemacht?
Sat de Schorsch: Die Amis sinn ins Bett gonge.
Ich frooch: Unn was hawwe die Amis im Bett gemacht?
Geschloofe, sät de Karl.
Ja, saach ich, so Alte wie mir. Awwer was hawwe die junge Amis im Bett gemacht?
Kinner, sät de Schorsch.
Siehsde, saach ich, so sinnse halt, die Kombjuder.
Eiern Honnes
