Riwwelkuche oder Ribbelkuche

Aus Flerschemerisch.de

Renate: Ei wo bleibt donn der Kerl widder? Der wollt doch zum Kaffeedrinke doo soi. Wenn der bei soine Schleeschtschwätzer omm Moo sitze dut kimmder nimmi fort. Isch hab joo schunn schpeggeliert, dasser später kimmt aber su spät iss der noch nie kumme. Ach ich glaab, ewe gieht die Dier.

Jakob: Hier bin isch, iss de Kaffee ferdisch?

Renate: Dess gefällt merr, Dier uff unn gleich uffen Kaffee sterze. Jakob,wo kimmst Du donn jetz her?

Jakob: Ja mir hawwe unne omm Moo uffem Bänksche gesotze, uff die Fliescher geschennt, e bissi dischpediert unn doodebei die Zeit vergesse.

Renate: Doo seider bestimmt widder vom Hinkelsche uffs Giggelsche kumme. Habder aach widder die Leit geuuzt?

Jakob: Naa Renate, gar nitt. No ja, nitt so vill, nur e bissi, werklisch.

Renate: Also verzähl! Was habder donn gemacht?

Jakob: Ei, doo iss so ooner doher kumme, mit emm kloone Flehbutz onn de Loi,und der wollt zu dere neie Kuldurscheier. Unn der hott de Weesch nitt gewusst.

Renate: Unn habderm de Weesch gezeischt?

Jakob: Jaa, hawwe merr, gonz genau isses emm vergliggert worrn. Merr hawwen bein Bauer Göttge geschickt, der hott doch e Scheier unn e paar Kuldurn hott der aach. Unn dann hawwe merr uns schnell fortgemacht. Unn hawwe uffem Hoomweesch noch e bissi Schellekloppe gemacht, dess hält jung im Alter.

Renate: Ihr seid abber ach ahle Simbel, wie die kloone Kinner.

Jakob: Was schawenzelsde dann doo su um misch erum unn schnupperst so komisch?

Renate: Du rischst als wärsde beim Joffsche in de Räuscherkommer gewese. Hott de Schorsch widder neber Derr gesotze unn soi schtinkische Schtumpe geraacht?

Jakob: De Schorsch, der raacht nur guude Siggarn

Renate: Ach heer doch uff, der mit soine 50 Penning Stumpe, die rische ferschderlisch. Ess nächsde Mol hocksde Disch woonnerst hie.

Jakob: Ei Renate, jetz reesch Disch halt nitt su uff.

Renate: Guud, komm, jetz drinke merr erst emol e Tässje Kaffee. Willsde e Leckmajebrot odder lieber Kuche?

Jakob: Isch det liewer e Stickelsche Kuche esse. Hosde donn die Flerschemer Zeitung schunn gelese? Was schteht donn droi ?

Renate: Ja, habb isch, unn der Honnes doo, wer immer dess iss, der hott doo widder e Zeisch geschribbe. So schwetzt doch koon Flerschemer. Doo merkt merr gleisch, dass der nitt im Schadde von de Kersch geborn worrn iss. So enn Rischdische von hier det dess gonz onnerst mache.

Jakob: Och isch finn dess eischendlisch gonz gut, was der su schreiwe dut. Was hosde donn heit fern Kuche?

Renate: Isch habb Merwes, Quetschekuche unn Ribbelkuche.

Jakob: Prima, awwer dess heest Riwwelkuche, die Flerschemer saache Riwwel!

Renate: Im Lebe nitt. Dess heest RiBELLkuche und nitt RiWELL kuche. BELLE wie uff fronsesisch SCHEE. Nitt WELLE wie uff deutsch Wasser.

Jakob: Ei Renatsche, Du bist joo nimmi gonz klar im Kopp. Fronsesisch! Beim Portmonnee loss isch merr dess noch gefalle awwer nitt beim Kuche. Jeder echte Fleschemer sät Riwwelkuche, doo gibts gaa nix.

Renate: Heer doch uff. AWWer unn RiWWel, so habbe die Leit vor 100 Jorn geschwätzt, alse koo Zee mehr im Maul hadde. Abber seit die Kohle hier die Zee nei mache, sät jeder RiBBelkuche.

Jakob: Naa, ess heest doch awwer und hawwe und Lewe, unn nitt AABER, HAABEN un LEEBEN! Dess iss doch gonz klar.

Renate: Ribbel oder Riwwel - was leit merr droo! Jetz werd gesse. Mir gieht der Zerkus jetz uff die Nerve. Isch denk, mir frooche omm beste mol den Metzjer.

Jakob: Was willst donn enn Metzjer frooche ? De oonsische und letzde rischdische Metzjer in Flerschem isses Joffsche, unn der waaß dess nitt.

Renate: Naa, isch moon doch den aus Trebber.

Jakob: Jetz fängsde joo schunn widder oo, dess heest Trewwer Unn was soll dann enn trewwerer Metzjer mit Flerschemerisch ze due hawwe?

Renate: Naa, isch moon doch den Obergescheide, den Professer doo, der sich mit dene Werrder su auskenne dut.

Jakob: Ach, jetz waaß isch wen de moonst. Der heest awwer doch Metzner unn iss aus Risselsem. Jo, den kenne merr mol frooche, dess mache merr. Aber jetz loss uns endlich den Kuche esse. Ribbel hie, Riwwel her. Ei Renatsche, jetz guck derr dess emol oo. Doo unne sitzder joo, de Professer Metzner. Jetz kenne merr gleich mett de Froocherei oofonge.